Die toer begin met twee dae vrye tyd in Lisabon – Portugal se heuwelagtige hoofstad op die kus.  Een van Europa se mees charismatiese en lewendige stede met sy pastelkleurige geboue en kleurvolle kastele. Hier het jy twee dae vrye tyd waar bed en ontbyt ingesluit is.

Dan vertrek ons Porto toe. Daar word dikwels gesê: “Ontdek die skoonheid van die Douro en jy kyk direk in die siel van Portugal!”

Met 'n riviervaart op die Douro, verken ons hierdie pragtige streek van Portugal, van sy Middeleeuse stede tot sy eeue-oue wingerde. Gaan proe 'n paar heerlike portwyne, eet by 'n tradisionele quinta, verken strate vol oudwêreldse sjarme, of waag dit om die historiese en kulinêre lekkernye te ontdek. 

Iemand skryf: “’n Vaart op die Douro-rivier is dalk nie heeltemal dieselfde  as ander bekende Europese riviere nie, maar sy pragtige natuurskoon van skuins wingerd-terrasse gee dit ‘n voorsprong. Een van die beste dinge van 'n Douro-riviervaart is die ongerepte natuurskoon en fassinerende dorpe, kloosters en tuine. Die Douro is aansienlik minder kommersiëel as byvoorbeeld die Donau, die Seine, die Rhône of die Ryn. Trouens, wanneer ek oor my Douro-riviervaart nadink, dink ek aan woude en wingerde en rotse en voëls. Hoewel ons 'n paar ander rivierbote teëgekom het, het dit meestal gevoel asof ons die rivier vir onsself gehad het. En die Portugese is van die warmste en vriendelikste mense wat ek in Europa teëgekom het. Hulle lag maklik, vinnig met 'n grappie, trots op hul land en wil seker maak jy waardeer en geniet alles soveel soos hulle.”

Ons begin in Porto, die tuiste van Portwyn, straatkuns en "francesinhas" ('n Portugese toebroodjie met brood, ham, biefstuk, linguica-wors en gesmelte kaas bo-op). Porto het 'n unieke atmosfeer met elegante woonbuurte en groot villa's in smal geplaveide straatjies. Porto is net die perfekte grootte om te voet te verken en in sy stegies vol geskiedenis en nostalgie rond te dwaal. Gaan geniet ‘n aandstappie langs die Douro-rivier, ‘n besoek die tradisonele Mercado do Bolhão of gaan proe van sy bekende Port-wyne.

​