Ons is 'n familiebesigheid wat groepe van ongeveer 30 Suid-Afrikaners oorsee neem op toere en avonture.

 

G’n maatskappy val net uit die lug nie.  Marius du Plooy Toere ook nie.

​

Ek vermoed ons toertande het in 1975 begin groei toe Magda en ek vir twee jaar in Holland gebly het. Ek was die SAUK se korrespondent met stories en programme vir RSG.

In daai tyd het ons naweke en vakansies dele van Europa volgereis…. Die gogga het gebyt.

​

Jare later het ons betrokke geraak by die bemarking van Le Boat se kanaalvaarte in Europa. Vir sowat 15 jaar het ons byna elke jaar ‘n kanaalvaart onderneem en elke keer ‘n stukkie iets anders van Europa en omstreke bygedoen en ontdek: Italië, Kroasië, Slowenië, Frankryk, Turkye…

​

Die eerste jare se toere was met vriende, familie en kennisse.

In 2015 het ons formeel afgeskop met ons eerste Italiaanse toer. Die belangstelling was so groot dat ons ‘n tweede Italiaanse toer rug-aan-rug moes reel.

​

Die res is geskiedenis: Sederdien het van ons toere lande ingesluit soos Griekeland, Turkye, Holland, Belgie, Frankryk, Italie, Kroasie, Slowenie, Oostenryk, Hongarye, Slowakye, Portugal, Duitsland, Switserland, Marokko, Spanje, Tunesie……en wees verseker - nog is dit het einde niet! Ons beplan nog wyd.

​

In ‘n sin is Marius du Plooy Toere ‘n familiebesigheid met myself (Marius) en Magda voltyds betrokke en ons kinders, Johann, Karen, Marius (jr), Simcha en Mandi wat deeltyds betrokke is. Ons maak ook gebruik van ‘n uitsoekgroepie toerleiers op ‘n vryskutbasis.

Ons het almal ook media-, kommunikasie- en baie reiservaring.