Behalwe pragtige plattelandse dorpies, besoek ons bekende groot stede soos Amsterdam, Rotterdam en Keulen (Cologne), wat min bekendstelling nodig het.

Amsterdam bekoor besoekers met sy ikoniese kanale en historiese kanaalhuises, wêreldklas museums en meer fietse as wat jy kan tel.  

Rotterdam is Nederland se moderne metropool, bekend vir sy indrukwekkende argitektuur, besige hawe en vooruitstrewende karakter. 

Keulen is 'n lewendige stad in Duitsland, aan die oewer van die Ryn.  Met sy ryk geskiedenis, ’n gesellige ou stad en veral bekend vir die majestueuse Keulense Katedraal – een van Europa se mees indrukwekkende, Gotiese geboue.  

Cochem is ’n asemrowende dorpie wat in die Moselriviervallei van Duitsland geleë is. Dit is bekend vir sy indrukwekkende, middeleeuse kasteel, terraswingerde en die ou stad met sy karaktervolle houtbalkhuise.  Dwaal deur die bekoorlike Marktplatz (Markplein) om 17de-eeuse houtbalkhuise, tradisionele wynkroeë en oorblyfsels van die ou stadsmure te bewonder.  Cochem is ook ’n uitstekende plek vir wynproe.  Die Moselstreek is wêreldbekend vir sy Rieslingwyn.

Trier is Duitsland se oudste stad.  Dit spog met meer as 2 000 jaar se geskiedenis en indrukwekkende Romeinse erfenis. Van die ikoniese Porta Nigra, wat deur die Romeine gebou is, tot die pragtige markplein en historiese kerke.

Net buite Trier, lê die rustige dorpie Mehring.  'n Skilderagtige wyndorpie aan die oewer van die Moselrivier, omring deur heuwels wat bedek is met wingerde.  Die dorp bied 'n egte voorsmakie van die Duitse platteland, met sy wynkelders, ou geboue en ontspanne atmosfeer.

Bernkastel-Kues, is waar kleurvolle houtbalkhuise, kronkelende stegies en uitsonderlike Moselwyne saam 'n sprokiesagtige atmosfeer skep.

Waar die Ryn en Mosel ontmoet, lê Koblenz, 'n stad wat besoekers betower.  Koblenz se historiese ou stadsplein, is omring deur gesellige kafees, winkeltjies en geboue wat eeue se geskiedenis weerspieël.  

Nijmegen is die oudste stad in Nederland, en spog met ’n baie hoë studentepopulasie.  Dis hier waar meer as 2 000 jaar se geskiedenis gekombineer word met 'n lewendige, moderne atmosfeer.