Ons vlieg tot in Napels, besoek die geskiedkundige rampgebied van Pompeї, die unieke Amalfi-omgewing en Positano.

Op pad na Florence maak ons ‘n halfdag-draai in Rome. Mens mag mos nie net daar verby ry nie!

In Florence stap ons saam met ons gids, Vincenzo, deur die oudste dele van die stad met verstommende stories oor die wat waar en hoe. Ons eindig by die Academia-museum waar Dawid reeds baie dekades in sy marmernaaktheid staan en poseer.   Om te dink Michelangelo was maar 26 jaar oud toe hy in 1501 opdrag ontvang het om die 5.17 meterhoë standbeeld te skep. 

Na Florence pak ons tasse uit in die pragtige San Gimignano. 

Van daar af besoek ons elke dag ‘n heuweldorpie of twee en geniet ‘n halfdag Italiaanse kook-ervaring op die wynlandgoed, Guardastelle. By die skilderagtige Montefiorale gaan ons wyn proe voordat ons, soos byna elke aand in San Gimignano op die plein op die put se trappies gaan sit en ‘n egte Gelato verorber.

Dan nog ‘n hoogtepunt – Twee dae in Cinque Terre, wat deur baie beskou word as een van die mees besondere en skilderagtige gebiede van Italië…met sy vyf (cinque) kleurvolle dorpies wat soos swaeltjieneste bo die see hang…    

Maar om alles wat voorlê te probeer beskryf is ‘n onbegonne taak…. Want hoe beskryf mens die lekkerste lekker eet- en drinkgoed, die emosionele gevoel van iets wat jy vir altyd wil vasvang, nuwe ervarings wat spruit uit eeueoue geboue en gebeure…?

Ons sien jou in Italië.